DES MÊS BANDIS

Quanche  i torni des mês bandis, tes oris che nol  bat il soreli, mi plâs cjaminâ pes stradis che mi partin dentri i borcs dal pais. E tantis voltis, ancje se i aì pôre dai cjans o cjapi le volte des andronis par rivà  fin tal cûr dai curtîi. Jê vere, ce che mi sburte   l’à dentri in chei  cjantons  che se no larès di  proposit no ju viodarès mai plui,   jê le me indole di om curiôs. Ma ce che mi sburte, par dile  dute, a meti il nâs  di dentri  chei lûcs l’è il plasê di scuvierzi cemût ca l’è cambiât il me pais, le me int.

Quanche jeri frut  chês andronis jerin plenis di canais, fantaçs, fantatis e oms e feminis fûr di pupil. Tai curtîi si sintive simpri berghelâ  cualchidun e cjaminant su le tiere batude di chês stradis o vevi di stâ simpri atent indulà che o metevi i pîs par no finî sun tun sbit di dindi o di gjaline o piês ancjemò sun t’une buiace.

Tes andronis si viodeve parcâts simpri un, doi, trê cjârs di fen o di meniche ca spietavin di jessi discjamàs. Insome in chei lûcs si scoltave suns di vite in  ducj i cjantons: fruts, frutis, bestiis, feminis.... .e te biele stagjon vie pe zornade si zontave il cjant des  cisilis.

L’ultime volte che a soi tornât, soi lât a fa une cjaminade pes stradis dal borc di Palût. Di fruts, di un cristian nancje le ombre e tal puest dai vecjos cjars parcâts te androne jerin trê machinis che cuant che van di buride corin come une saete.

Tra chês stradis, la che ogni troi  jere taponat dal catram, no si sintive anime vive,  scuasi di fami pensâ di ve sbaliade strade e di ve  cipade le volte dal cimitieri.

Sintivi dome un stranì rumôr  che in tun prin moment mi someave il cjant di une lodule barbote. Invezit l’ere il sunsûr dal modem di un canai che si colegave a le rêt, ma non a che di Faustin Mulinâr, indulà che si cjapavin i uciei, ma a le  rêt di internet.

Si il me pais le propit cambiât! Ma in miôr o piês?

A viodi chês machinis, le elegance di chês cjasis dal dut pituradis di gnûf, infin il sun di chel tramai  moderni mi ven di pensâ  che il me paiis sedi propit cambiât in miôr. Cui sâ se je vere?

Pecjât che di ce che il borc mi mostrave quanche jeri frut l’è restât ben pôc, nancje un mandi o un bundì, ma sôl, chei sì, un bon odôr di ledan e il vuacà di cualchi cjan.